સચિન ખાતે ભાવભીનાં હૃદયે અને શાંતિપૂર્ણ માહોલમાં શ્રીજીને વિદાઈ અપાઈ..

ચોર્યાસી ધારાસભ્ય શ્રી સંદીપ દેસાઈની સચીન સ્થાને વિશેષ ઉપસ્થિતિ .

પ્રજા પંખ સચિન, :- આનંદ ચૌદસના શુભ દિવસે, સચિન ખાતે સુરત મહાનગર પાલિકાના કૃત્રિમ તળાવમાં શ્રીજીના વિસર્જન કાર્યક્રમનો ભવ્ય સમારંભ ઉલ્લાસભેર ઉજવાયો. સવારથી ભક્તિભાવ સાથે ભક્તોએ અંતિમ આરતી કરી અને "પુઢચ્યા વર્ષી લવકાર યા"ના નારા સાથે શ્રીજીને ભાવભીનાં હૃદયે અને નમી આંખે વિદાય આપી. સમગ્ર વાતાવરણમાં ભાવવહાલ અને ભક્તિમય ઉલ્લાસ છવાઈ ગયો હતો.

વર્તમાન ચોમાસાની ઉકળાટને ન અવગણતાં, ભક્તોએ તડકામાં ખુલ્લા પગે "ગણપતિ બાપ્પા મોરિયા"ના નારા સાથે પોતાની અઢળક ભક્તિ પ્રગટ કરી. સાથે આરએસએસ દ્વારા સેવા રૂપે વિસર્જન માટે આવેલા ભક્તો માટે લીંબુ પાણીની વ્યવસ્થા ગોઠવાઈ હતી, જ્યારે બીજી તરફ શ્રી સુરત ગણેશ મંડળના સહકારથી બાલાજી ગૌ સેવાના સેવકધારકોએ છાસ અને લીંબુ પાણીની સ્વાદિષ્ટ સેવા ભક્તોને અપાઈ હતી ઉપરોક્ત સેવાઓ ભક્તોને તાજગી આપતી જોવા મળી. પ્રસંગને અનુરૂપ ચોર્યાસી ધારાસભ્ય શ્રી સંદીપ દેસાઈ, નગરસેવકો, સરકારી અધિકારીઓ, પોલીસ અધિકારીઓ, સામાજિક આગેવાનો તથા શહેરના પ્રતિષ્ઠિત વ્યક્તિઓ આ પ્રસંગે ખાસ ઉપસ્થિત રહ્યા અને શ્રી સુરત ઉત્સવ સમિતિના ઉપપ્રમુખ મેહુલ પટેલ અને સંયોજક પ્રશાંત દેસાઈ સહિતના પદાધિકારીઓએ તેમનું અને અન્ય ભક્તજનોનું ખેસ પહેરાવીને સ્વાગત કર્યું હતું. સાથે ગણેશ સમિતિના મિત્રો સમગ્ર આયોજન દરમ્યાન ભક્તોની મુશ્કેલીઓ પણ દૂર કરવા તત્પર રહ્યા હતા.

સચિન પોલીસ ઇન્સ્પેક્ટર પી. એન. વાઘેલા તથા તેમની ટીમના માર્ગદર્શન હેઠળ સુવ્યવસ્થિત પોલીસ બંદોબસ્ત ગોઠવાયો હતો, જેથી કોઈ પણ પ્રકારના ટ્રાફિક જંજાળ અથવા અન્ય અવ્યવસ્થા ન સર્જાય. ભાવિકભક્તો વિસર્જનવિધિ નિરાંતે પૂર્ણ પાયે કરી શકે તે માટે એસ એમ સી અધિકારીઓ દ્વારા તળાવ બાંધકામ અને પોલીસ દ્વારા ટ્રાફિકની સરળતા પર વિશેષ ધ્યાન આપવામાં આવ્યું હતું.

આ સમગ્ર દિવસ દરમિયાન, રાત્રીના 10:30 વાગ્યા સુધીમાં અંદાજિત 2000 મૂર્તિઓનું વિસર્જન શાંતિપૂર્ણ રીતે પૂર્ણ થયું.