લોકપ્રિય ધારાસભ્ય સંદિપ દેસાઈ, નગર સેવકો, વિવિધ વિભાગના અધિકારીઓ સાથે અનેક મહાનુભાવોએ.....

કુત્રિમ તળાવની મુલાકાત લઇ સંતોષ વ્યક્ત કર્યો.

સચિન કુત્રિમ તળાવમાં વિસર્જન માટે આજે ભક્તિ અને શ્રદ્ધાપૂર્ણનું વાતાવરણ જોવા મળ્યું....

પ્રજા પંખ સચિન: સુરત શહેરમાં વોર્ડ નંબર ૩૦ તરીકે સમાવેશ થયા બાદ છેલ્લા ત્રણ વર્ષથી સચિન ની કાયા પલટ થઈ રહી છે. જેમાં ખાસ ગણેશ પર્વને લઇને કુત્રિમ તળાવ ની ગોઠવણ, સ્થાનિક મનપાના ત્રિદેવ જેવા અધિકારીઓની સુજબુઝ દ્વારા પ્લાનિંગથી સચિનનું કુત્રિમ તળાવ ઉભુ કરવામાં આવે છે જેથી ગણેશ ભક્તોને ગણેશજીની વિદાયના કોઈ તકલીફ ન પડે તેનું ધ્યાન અપાય છે.

સનાતન ધર્મના જ્યોતિષ શાસ્ત્ર પ્રમાણે ખુદ શ્રી જી ભાદ્રપદ મહિના નાં શુકલ પક્ષની ચતુર્થી તિથિના અવસરે તેમના નિવાસ કૈલાશમાંથી ઉતરીને ધરતી પર વિચરણ કરે છે.

એ પ્રસંગને લોકો દસ દિવસ સુધી ગણેશ મૂર્તિ સ્થાપન કરી પોતાના ઘરે ગણેશજીને પધારવા આહવાન કરે છે.એમના આગમન બાદ ૧૦ દિવસ વિશેષ પૂજા કરાય છે અને અંતિમ દસમા દિવસે ભાવભીની વિદાય અપાય છે. આ રીતે સુરત અને આજુ બાજુના ગામોમાં અનેક પ્રકારના અલગ અલગ થીમ પર શ્રી ગણેશ સ્થાપન કરાય છે. દા. ત. આ વખતે અનેક પંડાલોમાં ચંદ્રયાન ૩ તથા રામ મંદિરની ડીઝાઈન તૈયાર કરાઇ હતી, સાથે સાથે અનેકના ઘરોમાં પણ ગણેશ જીનું સ્થાપન કરી પૂજા અર્ચના ડેકોરેશન કરવામાં આવે છે. આજે દસ દિવસ પૂર્ણ થઈ જતાં સચિન નાં કુત્રિમ તળાવમાં શાંતિપૂર્ણ માહોલમાં ૧૫૦૦ થી ઉપર નાનાં મોટા ગણેશ દાદા નું વિસર્જન કરવામાં આવ્યું હતું. ત્યારે નાના મોટા સૌ કોઈ ગણપતિ બાપા મોર્યા નાં નાદ સાથે શ્રદ્ધા અને ભક્તિભાવપૂર્ણ વિસર્જન કરતાં દૃશ્યો જોવા મળી રહ્યા હતાં. ઘરે કે મોહલ્લમાંથી વિસર્જન તરફ પ્રયાણ કરતાં સવારીઓમાં હજારો ભાવિક ભક્તો પોતાની અતુટ ભાવ સાથે જોડાય છે. પ્રતિબંધિત હોવા છતાં ડીજે અને ફટાકડાના ધૂમધડાકા સાથે અને જેમાં ઢોલ નગારાનો ધ્વનિ અલગ જ તરંગ પેદા કરતો કરતો કુત્રિમ તળાવ તરફ પ્રયાણ કરે છે ત્યારે ભક્તોના નાચ ગાન સાથેના દૃશ્યો જોવા લાયક હોય છે. સાથે સાથે ગણેશ પર્વને જોવા વચ્ચે ડીવાઈડર કે આજુબાજુ ફૂટપાથ અને દુકાનો પરની માનવ મેદની પણ મોટી સંખ્યામાં ઉમટી પડે છે. ત્યારે પ્રેક્ષકો, ભાવિક ભક્તો અને સાથે ટ્રાફિક ને કંટ્રોલ કરવા ભારે ગરમીના ઉકળાટ વચ્ચે ખડે પગે

પોલીસ, સીઆરપી જવાનો, હોમગાર્ડ, એફ પી ઑ, સુરત શહેર ગણેશ ઉત્સવ સમિતિના સ્વયમ સેવકો બધાજ ચુસ્ત બંદોબસ્ત કરતાં નજરે પડે છે એ પણ જોવાનો લહાવો અનેરો આનંદ આપે છે. સચિન ખાતેનાં કુત્રિમ તળાવ પાસે એસ એમ સી બી ઝોન દ્વારા દ્વારા ગણપતિ રજીસ્ટ્રેશન માટે અલગ વ્યવસ્થા હતી સાથે સુરત શહેર ગણેશ ઉત્સવ સમિતિનું અલગ સ્ટેજ પુછપરછ અને માર્ગદર્શન માટે બનાવાયું હતું. જ્યાં ઉપપ્રમુખ મેહુલ પટેલ અને અન્ય સમિતિના સદસ્ય દ્વારા માર્ગદર્શન સાથે સાથે સહુ પધારતા મહેમાનોનું અને અધિકારીઓનું સ્વાગત કરાઈ રહ્યું હતું સાથે સાથે માઇક દ્વારા ગણેશ સવારીનાં ભક્તોને માર્ગદર્શન કે જોઈતી મદદ પૂરી પાડવામાં આવી રહી હતી. ઉપરાંત એસીપી આર એલ માવાણી તથા સચિન પી આઇ આર આર દેસાઇ નાં માર્ગદર્શનમાં ચુસ્ત બંદોબસ્ત ગોઠવવામાં આવ્યો હતો આ વખતે ટેરેસ પરથી પણ ખાસ પોલીસ વોચ ગોઠવી હતી. સાથે સાથે સચિન કુત્રિમ તળાવમાં કોઈ ભાવિક ભક્ત કે પત્રકારને અંદર ન જવાની સખત નોટિસ અપાઈ હતી. તળાવ ની સંપૂર્ણ જવાબદારી બી ઝોનના અધિકારીઓ ડે.કમિશ્નર હર્ષદ કીનખાબવાળા, આસિ. કમિશ્નર પ્રવીણ પ્રસાદ અને કાર્યપાલક એન્જિનિયર રાજેશ જરીવાળા ની હતી જ્યારે લાઈટ વીજ પુરવઠો ડીજીવિસિએલ નાં પટેલ દ્વારા સાંભળવામાં આવી હતી. સમગ્ર

વિસર્જન સાથે સાથે ગણેશજીનો પૂજાપો બાબતે નાયબ આરોગ્ય અધિકારી એ.પી. ભટ્ટ જીના માર્ગદર્શનમાં આરોગ્યનાં કર્મચારીઓ દ્વારા સમગ્ર પૂજાપો વર્ગીકૃત કરી અંદાજિત ત્રણ ટન જેટલા કચરાનું ખાતરમાં રૂપાંતરિત કરાશે. આમ પ્લાનિંગ પ્રમાણે સમગ્ર તંત્ર અપડેટ્સ મા રહેતું હતું. ગણેશ સવારીની એન્ટ્રી બાદ ટોકન આપવાની કામગીરી પણ બહુજ સારી રહી હતી. દરેક કર્મચારી તથા ગણેશ ઉત્સવ સમિતિના સ્વયં સેવકો, સચિન પોલીસ, હોમ ગાર્ડ અને જવાનોની પ્રશંસનીય કામગીરી કરી હતી એવું સુરત શહેર ગણેશ ઉત્સવ સમિતિના ઉપાધ્યક્ષ મેહુલ પટેલ એ પ્રજા પંખ અખબાર ને જણાવ્યું હતું.