ચેમ્બર ઑફ કોમર્સ દ્વારા રાજેશ ધામેલિયાને શ્રેષ્ઠ શિક્ષક એવોર્ડ એનાયત કરવામાં આવ્યો.

આ પૂર્વે રાજેશ ધામેલિયાને રાજ્યપાલના હસ્તે શ્રેષ્ઠ શિક્ષક રાજ્ય પારિતોષિક', મોરારિબાપુના હસ્તે 'ચિત્રકૂટ શ્રેષ્ઠ શિક્ષક' સહિત અનેક ઍવૉર્ડ મળી ચૂક્યા છે.

પ્રજાપંખ :- રાષ્ટ્રનું ઘડતર કરવામાં મહત્ત્વપૂર્ણ યોગદાન આપનાર શિક્ષકોનું સન્માન કરવું જોઈએ અને તેમનાં કાર્યોને પ્રોત્સાહિત કરવા જોઈએ તેવા ઉમદાભાવ સાથે ધી દક્ષિણ ગુજરાત ચેમ્બર ઑફ કોમર્સ અને ઇન્ડસ્ટ્રી દ્વારા શિક્ષકોનું સન્માન કરવામાં આવ્યું હતું.

આ પ્રસંગે ન.પ્રા.શિ.સ.,સુરત સંચાલિત મહારાણા પ્રતાપ પ્રા.શાળા-નાના વરાછાના શિક્ષક શ્રી રાજેશ ધામેલિયાનું શ્રેષ્ઠ શિક્ષક એવોર્ડથી સંમાન કરવામાં આવ્યું.

શિક્ષણકાર્ય સાથે રાજેશ ધામેલિયાએ 'બાળ કેળવણી', સાચી જોડણી લાગે વહાલી' અને 'ભાષા સજ્જતા' જેવાં પુસ્તકોનું લેખન કાર્ય કર્યું છે. 20,000 વિદ્યાર્થીઓને વિનામૂલ્યે 'સાચી જોડણી લાગે વહાલી' પુસ્તિકાઓનું વિતરણ કર્યું છે. ન.પ્રા.શિ.સ.,સુરતની 300 શાળાઓ, રાજકોટની 200 શાળાઓ અને ભાવનગરની 65 શાળાઓમાં 'બાળ કેળવણી', 'સાચી જોડણી લાગે વહાલી' અને 'ભાષા સજ્જતા' પુસ્તિકાઓ ભેટરૂપે આપી છે. 2,00,000થી વધારે વિદ્યાર્થીઓ સુધી તેમની પુસ્તિકાઓ વસાવી છે. લાખો લોકોને આ પુસ્તિકાઓની pdf વિના મૂલ્યે પહોંચાડી છે. અનેક વર્તમાનપત્રો અને સામયિકોમાં તેમના લેખો પ્રસિદ્ધ થયા છે. ભાષા ગૌરવ અને સંવર્ધન અભિયાન દ્વારા માતૃભાષાનું સંવર્ધન કાર્ય કરી રહ્યા છે. ગુજરાતની 500થી વધારે શાળાઓમાં વિદ્યાર્થીઓ, વાલીઓ અને શિક્ષકો માટેના સેમિનાર યોજાયા છે. પરદેશમાં વસતા ગુજરાતીઓ માટેના ઓનલાઇન કાર્યક્રમો પણ યોજાયા છે.

શાળા પરિવારના તમામ શિક્ષક ભાઈઓ-બહેનો અને વાલીઓના સહકારથી શ્રેષ્ઠ શાળા બનાવી શક્યા છે. બસો વિદ્યાર્થીઓથી શરૂ થયેલી શાળામાં બે હજાર સાતસોથી વધારે વિદ્યાર્થીઓ અભ્યાસ કરી રહ્યા છે. આથી આ શાળા બે પાળીમાં (શા.ક્ર.272,16) ચાલે છે. રક્તદાન કેમ્પનું આયોજન, પુસ્તક પરબ, પુસ્તક મેળો વગેરે અનેકવિધ કાર્યક્રમો યોજી સામાજિક ઉત્તરદાયિત્વ સાથે વિદ્યાર્થીઓનું સર્વાંગી ઘડતર કરી રહ્યા છે. વીર શહીદ પરિવારો માટે આર્થિક સહયોગ મેળવી જય જવાન નાગરિક સમિતિને ચેક અર્પણ, શ્રી સ્વામિનારાયણ ગાદી સંસ્થાન દ્વારા માનવ સેવા અભિયાન દ્વારા વિદ્યાર્થીઓને વિનામૂલ્યે નોટબુક, દફતર વિતરણ; વિધવા બહેનોને સિલાઈ મશીન વિતરણ જેવી અનેક પ્રવૃત્તિઓમાં સ્વયંસેવક તરીકે કાર્ય કરી રહ્યા છે. આમ શૈક્ષણિક, સામાજિક,ધાર્મિક, રાષ્ટ્રીય વગેરે પ્રવૃત્તિઓ કરી રહ્યા છે.

આ પહેલાં રાજેશભાઈ ધામેલિયાને વિશિષ્ટ શૈક્ષણિક કામગીરી કરવા બદલ મહામહિમ રાજ્યપાલના હસ્તે શ્રેષ્ઠ શિક્ષક રાજ્ય પારિતોષિક,

શ્રી સ્વામિનારાયણ ગાદીના આચાર્ય શ્રી પુરુષોત્તમપ્રિયદાસજી સ્વામીજી મહારાજે “સાહિત્ય સુધાકર” પદવીથી નવાજ્યા છે. વિશ્વ વંદનીય સંત શ્રી મોરારિબાપુના વરદ હસ્તે “શ્રેષ્ઠ શિક્ષક ચિત્રકૂટ પારિતોષિક”, સિસ્ટર નિવેદિતા ફાઉન્ડેશન-રાજકોટ દ્વારા “સિસ્ટર નિવેદિતા શ્રેષ્ઠ શિક્ષક એવોર્ડ”, નગર પ્રાથમિક શિક્ષણ સમિતિ – સુરત દ્વારા “વિશિષ્ટ સેવા એવોર્ડ”, સુરત જિલ્લા શિક્ષણાધિકારી દ્વારા “સુરત જિલ્લાના શ્રેષ્ઠ શિક્ષક એવોર્ડ”, ભારતીય જનતા પાર્ટી શિક્ષણ સેલ- સુરત દ્વારા “ડો.સર્વપલ્લી રાધાકૃષ્ણન શ્રેષ્ઠ શિક્ષક એવોર્ડ” અને અચલા ફાઉન્ડેશન-અમદાવાદ દ્વારા “અચલા શ્રેષ્ઠ શિક્ષક એવોર્ડ’ રોટરી ક્લબ ઓફ સુરત ઇસ્ટ દ્વારા “શિક્ષક સજ્જતા એવોર્ડ”, 161 વિધાનસભા મતવિસ્તારમાં બે વખત “બેસ્ટ બી.એલ.ઓ. એવોર્ડ”, શ્રી સ્વામિનારાયણ ગુરુકુળ – રાજકોટ સંસ્થાન દ્વારા “સેવા સન્માન એવૉર્ડ” વગેરે અનેક એવોર્ડથી સમ્માનિત કરવામાં આવ્યા છે.